მინდია ჯანელიძე არაკვალიფიციურობის, სიბრიყვისა და სრული ნონსენსის კოქტეილი იყო" - ინტერვიუ ნოდარ ხარშილაძესთან

ამოსაბეჭდი ვერსია შრიფტის დაპატარავება | შრიფტი | შრიფტის მომატება ?
14-05-2015, 14:13 | პოლიტიკა | ნანახია - 1875

მინდია ჯანელიძე არაკვალიფიციურობის, სიბრიყვისა და სრული ნონსენსის კოქტეილი იყო" - ინტერვიუ ნოდარ ხარშილაძესთან

 

შინაგან საქმეთა სამინისტროში დაგეგმილი რეფორმა, მთავრობასა და პრეზიდენტს შორის არსებული დაპირისპირება, ნატო და რიგის სამიტი, თავდაცვის ახალი, პირველი ქალი მინისტრი, საქართველოს ევროატლანტიკური კურსი... ამ და სხვა თემებზე „აქცენტი“ თავდაცვისა და შინაგან საქმეთა ყოფილი მინისტრის მოადგილეს, სამხედრო საკითხებში ექსპერტს, საქართველოს სტრატეგიული და საერთაშორისო ურთიერთობების კვლევის ფონდის უფროს მეცნიერ-თანამშრომელ, ნოდარ ხარშილაძეს ესაუბრა.

 

- მინდა გკითხოთ შსს რეფორმაზე, დაიგეგმა, რომ სამინისტროს სისტემა ორად გაიყოფა და ცალკე უწყებად ჩამოყალიბდება სახელმწიფო უსაფრთხოების სამსახური. როგორია თქვენი მიდგომა ამ საკითხისადმი?

 

-ამით არსებული არ შეიცვლება, შინაგან საქმეთა სამინისტროს და ზოგადად, ამ სისტემას სჭირდება ფუნდამენტური ცვლილება. გაყოფილი შევარდნაძის დროსაც იყო, მოყოლებული მისი პრეზიდენტობიდან შინაგან საქმეთა სამინისტრო იყო პარტიული სტრუქტურა და მან ამ უწყებაზე დააფუძვნა სახელმწიფო ძალაუფლება. ანუ, ეს უწყება იყო ჟანდარმი, რომელიც უზრუნველყოფდა სახელმწიფოში არსებული ელიტის ძალაუფლებას. მაშინ კახა თარგამაძის დანიშვნა სწორედ ამის ნიშანი იყო. მაშინაც არსებობდა ცალკე უშიშროების საბჭო. შემდეგ მოვიდა მიხეილ სააკაშვილის ხელისუფლება, რომელმაც ამ უწყებას ფორმა შეუცვალა, გააკეთა საპატრულო პოლიცია, რომელიც გაცილებით უფრო კარგად ასრულებდა საზოგადოების უსაფრთხოების ფუნქციას. შევარდნაძის დროს საზოგადოებას ეს სტრუქტურა ეზიზღებოდა, რადგან პოლიცია თვითონ იყო გარეული კრიმინალში. სააკაშვილის დროს ეს უფრო დაიხვეწა, მან უფრო საზოგადოებრივი ფუნქციების შესრულება დაიწყო,მაგრამ ამ უწყების ფილოსოფიური ფუნქცია, როგორც ჟანდარმერის, კიდევ უფრო გაიზარდა. რომ შევხედოთ სააკაშვილის ხელისუფლების ანალიზს, შს სამინისტრი იყო მთავარი დასაყრდენი. ქვეყანას არ უნდა ჰყავდეს ჟანდარმი. ძალოვანი სტრუქტურა არ ნიშნავს ჟანდარმერიას. ხელისუფლების უსაფრთხოების გარანტი არის ხალხის ნება. ჟანდარმერია ნიშნავს პოლიტიკურ პოლიციას და ეს დღეს არ გამქრალა, ეს იყო სააკაშვილის დროსაც და არის დღესაც. ეს ფუნქცია არ ჩამორთმეულა.

 

- თქვენ ხართ წინა ხელისუფლების წარმომადგენელი, მათ შორის იყავით შს მინისტრის მოადგილე, შეგიძლიათ გვითხრათ, რატომ არ შეიცვალა მაშინ ეს სისტემა? პირადად თქვენ თუ გქონიათ ინიციატივა მის შეცვლასთან დაკავშირებით?

 

- არ შეიცვალა იმიტომ, რომ არ არსებობდა პოლიტიკური ნება. ამას უმაღლესი პოლიტიკური ნება სჭირდება. იმ მომენტში ძალაუფლების ელიტაში მყოფმა ადამიანებმა უნდა თქვან, რომ მე ამას არ გავაკეთებ. მაშინ მოხდება ეს. ცვლილების შეთავაზების საშულება არ ყოფილა. მე სამინისტროში მხოლოდ 2 თვე მომიწია მუშაობა. იქ ძალიან მკაფიოდ იყო ხაზგასმული, რომ ასე უნდა ყოფილიყო. რა მოხდა როდესაც ახალი მთავრობა მოვიდა? კუდ-ს შეუცვალეს სახელი, სოდ-ს შეუცვალეს სახელი, მეტი არაფერი შეცვლილა. დღეს კი უბრუნდებიან შევარდნაძის ფორმას. არანაირი მნიშვნელობა არ აქვს, სახელი რა ერქმევა, პოლიტიკური პოლიცია დღესაც რჩება, რასაც აქვს 2 ფუნქცია: წინასაარჩევნო პერიოდში პოტენციურ პოლიტიკურ ოპონენტებზე ინფორმაციის მოპოვება და საარჩევნო პერიოდში ე.წ. ადმინისტრაციული რესურსის სწორი გამოყენება და დამატებითი ხმების მოპოვება. შსს-ში დღეს არის 5 ფუნქცია გაერთიანებული: 1. სახელმწიფოს უსაფრთხოება, 2. კონტრდაზვერვა, 3. საზღვრის დაცვა, 4. საგანგებო სიტუაციებზე რეაგირება, 5. ეს არის პოლიტიკური პოლიცია, რომელიც ადრე იყო სოდ-ის და კუდ-ის სახელწოდებით. ამ ფუნქციებიდან ერთს იღებენ და გაჰყავთ გარეთ, ეს არის კონტრდაზვერვითი საქმიანობა. დანარჩენი ყველაფერი რჩება და ამიტომ, მე არსებით ცვლილებას ვერ ვხედავ. საქართველოს დღეს ჰყავს ჭუჭრუტანაში მაყურებელი და ყურდამგდები პოლიცია, რაც სირცხვილია. თავმოყვარე ქვეყნებში ასეთი სტრუქტურა არ ჰყავთ, განსაკუთრებით, კი მცირე ქვეყნებში. ამიტომ, ყველაზე მნიშვნელოვანია, რომ ეს უწყება გახდეს საზოგადოებრივი უსაფრთხოების უწყება და იყოს საპატრულო პოლიცია და კრიმინალური პოლიცია, დანარჩენი, რაც არის მიწებებული ფუქციები, რომელიც შევარდნაძემ დაიწყო და სააკაშვილმა წარმატებით მიაწება, ეს უნდა გაქრეს. უშიშროების ელემენტის გამოყოფა არაფერს შეცვლის გარდა იმისა, რომ კიდევ ერთი ადამიანი დასაქმდება. სამწუხაროდ, ამისი ნება დღეს არ არის. ეს უნდა იყოს ხალხის ნება, მაგრამ გამომდინარე იქიდან, რომ დღეს სოციალური პრობლემები უფრო ჭარბობს, ამ თემას ხალხი შედარებით, ნაკლებ ყურადღებას უთმობს. სოციალური პრობლემები რომ ნაკლები იყოს, ალბათ, ამაზე უფრო მოხდებოდა ფოკუსირება.

 

- ხელისუფლებამ დიდი ხანია მიიღო კანონი მოსმენების შესახებ. როგორია ტქვენი პოზიცია "გასაღებების სისტემასთან" დაკავშირებით?

 

-არაფერი არ შეცვლილა, გარდა იმისა, რომ დაცვის ინსპექტორის სახით კიდევ ერთი ადამიანი დაამატეს, რომელიც ასევე ამ უწყებას ექვემდებარება. დაწყობილ ქვეყანაში შეიძლება ასეც არსებობდეს, სადაც სისტემა გატესტილია და ხალხმა იცის, რომ შეიძლება მას ენდო. შიდა კონტროლის მექანიზმი არაფერს არ ნიშნავს. უნდა იყოს გარე მკაცრი კონტროლი. ე.წ. გასაღები აუცილებლად უნდა იყოს შსს-ს გარეთ. დღეს არის ისევ შიგნით. ჩემი აზრით, ყველაზე მართებული იქნებოდა, რომ ეს იყოს სასამართლოს ხელში.

 

- თვლით თუ არა, რომ დღეს სასამართლო დამოუკიდებელია?

  

-დღეს სასამართლო დამოუკიდებელი არ არის, მაგრამ ყოველ შემთხვევაში, შსს-ს მაინც არ ექვემდებარება. დღეს ბევრად უფრო დამოუკიდებელია სასამართლო, ვიდრე მიშას დროს იყო. ჩვენ დავინახეთ რამდენჯერ გამართლდა ახალაია, ამას მიშას დროს არ დაუშვებდნენ. მაგრამ დღესაც არის მოსამართლეთა ერთი ნაწილი, რომლებიც ნაწილობრივ არიან დამოკიდებული, ხოლო მეორე ნაწილი, რომელიც სრულიად დამოუკიდებულია. დღეს უფრო შერეულ მოდელზე ვართ. ამიტომ, უფრო აჯობებდა, რომ ე.წ. გასაღები სასამართლოში იყოს.

 

- ხომ არ ფიქრობთ, რომ ეს საქმეების გახსნის პროცესს გააჭიანურებდა?

 

- დემოკრატია ღირს ფასი. არ შეიძლება ეფექტიანობის გაზრდის მიზნით შენ აღკვეთო ადამიანის დემოკრატიული უფლებები. ამას ყოველთვის აქვს ფასი. რა თქმა უნდა, ეს ბევრად უფრო გაართულებს საქმეებს, მაგრამ არ არის ეს ის საქმეები, რომელიც კრიმინალის ზრდას რადიკალურად შეუწყობს ხელს. ვერანაირი მოსმენით ვერ აღკვეთავ, ვიღაც რეგვენები რომ ცოლებს კლავენ. ეს არ არის მოსმენებით გამოძიებული საქმეები. 15 წლის წინ სულ არ არსებობდა ტელეფონები, შესაბამისად, არ იყო მოსმენები, მაგრამ საქმეები იძიებოდა.

 

- საქართველოში ნატო-საქართველოს საწვრთნელი ცენტრი იხსნება. თქვენი აზრით, რამდენად მნიშვნელოვანია ეს შეთანხმება ქვეყნისთვის?

 

- რუსეთი რა თქმა უნდა ამაზე გაღიზიანდება, მაგრამ ჩვენ არ გვაქვს იმის პრივილეგია, რომ ნატო-სთან ურთიერთობა იმიტომ შევაჩეროთ, რომ რუსეთი გაღიზიანდება. რუსეთი ყოველთვის იქნება გაღიზიანებული, თუ მის მიერ წამოყენებული ამოცანა არ შევასრულეთ. ნატო-სთან თანამშრომლობა ერთ-ერთი ამოსავალია უსაფრთხოების უზრუნველყოფის თვალსაზრისით. უკრაინის მოვლენების ფონზე ეს წვრთნები ძალიან კარგი იქნება და ჩვენ ეს უნდა გამოვიყენოთ პოლიტიკურად, რომ საქართველო თანამშრომლობს ნატო-სთან. ჩვენი სამხედროებისთვის ეს ძალიან კარგი გამოცდილება იქნება.

 

- ახლოვდება რიგის სამიტი. რა შედეგებს უნდა ველოდოთ? რა დრო დაგვჭირდება იმისთვის, რომ ვიზა-ლიბერალიზაცია მივიღოთ?

 

- პრაგმატულს ვერაფერს ვხედავ, რა შეიძლება მიიღოს საქართველომ ამ სამიტზე პოზიტიური. ძალიან კარგი იყო, რომ ასოცირების ხელშეკრულებას მოვაწერეთ ხელი. ეს ჩვენი ქვეყნისთვის ისტორიული ნაბიჯი იყო, მაგრამ არ მგონია, რომ ამ ეტაპზე ჩვენ რაიმე ხელმოსაკიდი მივიღოთ რიგის სამიტზე. იქ ძირითადი გადაწყვეტილების მიმღები არიან გერმანია და საფრანგეთი. მე არ მგონია, რომ გერმანიისა და საფრანგეთის მთავრობა ამ ეტაპზე მზად იყოს ჩვენთან კიდევ უფრო ინტენსიფიკაციის. ისედაც თვლიან, რომ რაც მოგვცეს, ამ ეტაპისთვის საკმარისია. მე ვარანაირ ინდიკატორს ვერ ვხედავ, რომ რაიმეს დამატებით მივიღებთ ამ სამიტზე. ალბათ, იქნება პოზიტიური ტონი. რაც შეეხება უვიზო რეჟიმს, ეს ნაწილობრივ ჩვენზე და ნაწილობრივ მათზეა დამოკიდებული. ერთი, მათი ნება უნდა იყოს და მეორე, ჩვენი ვალდებულებების შესრულება უნდა მოხდეს. თუმცა უნდა აღინიშნოს, რომ გარკვეულ სფეროებში არის კმაყოფილებაც და უკმაყოფილებაც. არა მგონია, საქართველოსთვის უვიზო მიმოსვლის მინიჭება წელს ან გაისად მოხდეს.

 

- საქართველოსა და უკრაინის ეროვნული გვარდიებს შორის შედგა შეთანხმება და ისინი გრძელვადიან ურთიერთობაზე შეთანხმდნენ. იქ მიმდინარე მოვლენების ფონზე, რამდენად მომგებიანია მსგავსი შეთანხმება და რას მოუტანს ეს ქვეყანას?

 

- მე საერთოდ ვთვლი, რომ უკრაინასთან ჩვენ კიდევ უფრო ახლოს უნდა ვიყოთ. ჩვენ არც ერთი არ ვართ ალიანსის წევრი, ეხლა კი ყირიმის, დონეცკისა და ლუგანსკის შემდეგ თითქმის ერთნაირი პრობლემები გვაქვს. ამ თვალსაზრისით, ორ ქვეყანას შორის ალიანსზეც შეიძლებოდა ფიქრი. მოგვიტანს იმას, რომ უფრო მეტი გარანტიები გვექნება. უკრაინა უფრო დიდი და მეტი პოტენციალის მქონე ქვეყანაა. ეს მათთვის უფრო არის კითხვა, მათ რას მოუტანს? მსგავსი იდეა ჰქონდა აშშ-ს 2007-2008 წლებში, მაგრამ მაშინ ეს ვერ შედგა, რადგან ეს უკრაინას არ აწყობდა, მას ტერიტორიული პრობლემები არ ჰქონდა. დღეს კი მას იგივე პრობლემები აქვს, რაც საქართველოს. თუმცა ჩვენი დღევანდელი ხელისუფლება სულ სხვა განზომილებაშია. ისინი ცდილობენ, რომ რუსეთი დამატებით არ გააღიზიანონ. ეს ხელშეკრულება ძალიან კარგია, თუმცა ის არ ცვლის პოლიტიკურ სურათს. მთავრობა დისტანცირებულ პოზიციას ამჯობინებს უკრაინასთან. ეს ბატონი ბიძინა ივანიშვილის ნებაა, მას არ უნდა რუსეთთან დამატებით ურთიერთობის გაფუჭება.

 

- თქვენ წინა ხელისუფლების წარმომადგენელი ხართ, იმსახურეთ წამყვან ძალოვან სამინისტროებში და ამიტომ მინდა გკითხოთ, რას თვლით წინა ხელისუფლების ყველაზე დიდ შეცდომად?

 

- ჩემი აზრით, "იმედის“ დარბევა გადამწყვეტი მომენტი იყო. წინა ხელისუფლებამ რამდენიმე კარგი რეფორმა გაატარა, მაგრამ მოკლე ვადაში რთულია გაზარდო შენი პოპულარობა. რეფორმები როგორც წესი, ხშირად ხდება არაპოპულარული გადაწყვეტილების ფასად. მთავარი იყო, რომ დაიწყო ტოტალური კონტროლი როგორც პოლიტიკურ ოპონენეტებზე, ასევე პრესაზე. ამ გზით წასვლა იყო, ჩემი აზრით, ყველაზე დიდი შეცდომა. ეს იმით გამართლდა, რომ ამას საზოგადოება გრძელვადიან პერსპექტივაში დაგვიფასებსო. 2007 წლის ნოემბერში დარბევა გადამწყვეტი გახდა. მე მაშინ აშშ-ში გახლდით და შემიძლია გითხრათ, რომ მიტინგის დაშლა არავის გაკვირვებია, მაგრამ პრესაში შევარდნა არის დემოკრატიული რეჟიმის ერთ-ერთი ყველაზე დიდი დანაშაული. არ შეიძლება, რადგან პრესა არის ხიდი ადამიანსა და ხელისუფლებას შორის, ის არის დემოკრატიის მაკონტროლირებადი ძალა, ტყუილად არ ჰქვია მას მე-4 ხელისუფლება. იცით კიდევ რა მოხდა, მთავრობაში ყოველთვის იყო 2 ჯგუფი, უფრო პროგრესული ადამიანების ჯგუფი და ისეთები,რომლებიც უფრო კონტროლისკენ იხრებოდნენ. მაგ. გრიგოლ ვაშაძე, სიხარულიძე იყვნენ დასავლეთში განათლებული და დასავლურად ორიენტირებული და ისინი უფრო ლიბერალურ ფასეულობებს უყურებდნენ. იყვნენ ისეთი ტიპებიც, მაგ, ოქრუაშვილი, მერაბიშვილი, რომლებიც ხელისუფლების შენარჩუნებას ძალის გამოყენებით ხედავდნენ, უფრო კონტროლის ქვეშ ყოფნას. ამ ორ ჯგუფში სრულ გამარჯვებას მეორემ მიღწია და პირველი გამოდევნა.

 

- რა მიგაჩნიათ ამ ხელისუფლების მთავარ დამსახურებად და რას ფიქრობთ მთავრობისა და პრეზიდენტის ურთიერთობაზე?

 

-ვერ ვიტყვი, რომ არაფერი გაუკეთებიათ. შედარებით, უფრო თავისუფალია პრესა, შედარებით, ნაკლებად ხდება კონტროლი, ძალიან პატარა განსხვავებაა და ეხლა იმდენი ხალხი აღარ ზის ციხეში, რამდენიც იჯდა „ნაციონალური მოძრაობის“ დროს. რაც შეეხება მთავრობას და პრეზიდენტს, ეს არის კიდევ ერთი საბავშვო ბაღის კიდევ ერთი მაგალითი. ერთი პარტიიდან მოსული ხალხია, მაგრამ მათი ურთიერთობა სახეზეა. პრეზიდენტის არჩევა მოხდა ივანიშვილის ხათრით, ხალხი მას ნაკლებად იცნობდა, ის ძალიან ნიჭიერი ადამიანია, მაგრამ მისი ლეგიტიმურობა იყო ბიძინას მხარდაჭერა, რადგან მაშინ ხალხმა ხმა ბიძინას მისცა. იყო გარიგება, რომ მარგველაშვილს ექნებოდა მმხოლოდ მარგინალური და წარმომადგენლობითი ფუნქიები, მაგრამ შემდეგ მოსთხოვეს, რომ ეს ფუნქციებიც არ განეხორციელებინა, რაც ჰქონდა.

 

- ხომ არ გგონიათ, რომ ესეც ბიძინა ივანიშვილის ერთგვარი თამაშის ნაწილია?

 

- არ მგონია. მე მქონია შეხვედრა მათთან და საკმაოდ რეალური დაპირისპირებაა. უბრალოდ, ეს ყველაფერი არის მახინჯური. ბიძინას პოზიციაა, რომ ჩემს ნებას არ ასრულებს და ამიტომ არის ცუდი ბიჭი. ეს არის დაპირისპირების მთავარი მიზეზი. მთავრობა კი მის ნებას აშკარად ასრულებს. მან თქვა კიდევაც ეს: "60 წლის ვხდები და კაცს ასე არ მოვუტყუებივარო, როგორც მარგველაშვილმაო". პრეზიდენტი ცდილობს იმის დანახებას, რომ პრეზიდენტია. მას აქვს გარკვეული ძალაუფლება და ჩემი აზრით, უფრო კარგად უნდა გამოიყენოს. მას რამდენიმე ინიციატივის განხორციელების უფლება აქვს, რამდენიმე ჰქონდა, მაგრამ უფრო მეტის მოლოდინი გვაქვს. უფრო აქტიური უნდა იყოს. გავიხსენოთ კანონი, რომელიც ჯერ არ მიიღო, შემდეგ კი ხელი მოაწერა, წესით არ უნდა მოეწერა. თავისი პოზიციისთვის უნდა ეცა პატივი და ბოლომდე პრინციპული უნდა ყოფილიყო. გამოჩნდა, როგორც მისი სისუსტე. მას სახელმწიფო უწყებებში მუშაობის გამოცდილება არ აქვს და ალბათ, ნაწილობრივ, ამისი ბრალია.

 

-რაც შეეხება თავდაცვის სამინისტროს ახალ მინისტრს. როგორია თქვენი დამოკიდებულება ქალი მინისტრისადმი?

 

- მე მივესალმები ქალი მინისტრის დანიშვნას, სქესობრივად მნიშვნელობა არ აქვს, ქალი იქნება თუ კაცი მინისტრი. მაგრამ მინისტრი შეიძლება იყოს სამი კატეგორიის: 1. ის შეიძლება იყოს ტექნოკრატი, ანუ ადამიანი, რომელიც ძალიან კარგად ერკვევა თემაში, 2. შეიძლება იყოს პოლიტიკური პირი, რომელიც სპეციალისტურად არ არის, მაგრამ მოყვანილია, როგორც პოლიტიკური გუნდის წევრი და მესამე, რომელიც არ არის პოლიტიკური პირი და საზოგადოებრივად პოპულარული პირია დანიშნული. ბატონი მინდია ჯანელიძე არც ერთი არ იყო. ის იყო არაკვალიფიციურობის, სიბრიყვის და სრული ნონსენსის კოქტეილი, ამ მოკლე პერიოდში იმაზე მეტი გააფუჭა, რაც დანარჩენმა მინისტრებმა ერთად გაააკეთეს. ახალი დანიშნული იყო და პოლიტიკურ სკანდალში გაეხვა, დაღუპულ ჯარიკაცებთან დაკავშირებით, მერე ის, რომ ამდენი ხანი ქვეყნის სამსახურში მყოფი ადამიანები სამსახურიდან გაყარა, რომლებიც 15-20 წელია მუშაობენ, როცა მას შეხვედრაზე ვკითხეთ, რატომ გააგდო ისინი სამსახურიდან, ღიმილით მითხრა, რომ მიზეზები არსებობს, რომელსაც ვერ იტყვის, მერე კიდევ იმ სკანდალებში გაერია, რაც ეხება ფრანგებთან ხელის მოწერას, ანუ, 4 თვეში იმდენი სისულელის გაკეთება მოასწრო, მართლა რეკორდი დაამყარა. საქართველო სისულეებში ისედაც არ ვართ უკან, საკმაოდ უცნაური მინისტრები გვყავდა სხვადასხვა სფეროებში.

 

-ამ სამი დასახელებული ვარიანტიდან, ქალბატონი თინა ხიდაშელი რომელია?

 

-ამ სამიდან ის მკაფიოდ გამოკვეთილი მეორეა, ანუ პოლიტიკური ფიგურა. ძალიან კარგია, ის არა მარტო პოლიტიკური ფიგურაა, ღარიბაშვილის პირადი ტიპიც არ არის, როგორც მინდია. მისი მინისტრად დანიშვნა, უფრო ივანიშვილის გადაწყვეტილებაა, ვიდრე ღარიბაშვილის, არა მგონია მას ძალიან გახარებოდა ეს, ჩვენ გვახსოვს ის ჩანაწერები, რაც მათ უკავშირდება. თინა კოალიციაში კონკრეტულ ძალას წარმოადგენს, რომელიც არის „რესპუბლიკური პარტია“. მინდია არაფერს არ წარმოადგენდა, ის იყო ღარიბაშვილის პირადი ტიპი და რასაც ეტყოდა, იმას გააკეთებდა. თინა ასეთი არ არის, თინას თავისი ამბიციები აქვს, თავისი პრეტენზიები აქვს. თინა ხიდაშელი ხვალვე რომ გადადგეს მინისტრობიდან, მას უკვე მეტი აქვს გაკეთებული, ვიდრე მინდია ჯანელიძეს. ასე რომ, მივცეთ დრო, ვაცალოთ. ზომიერად ამბიციური ცუდი არ არის და მას ექნება შანსები რაღაცეების გაკეთების. ვერ დავეთანხმები „ნაციონალური მოძრაობის“ ნეგატიურ შეფასებას პირველივე დღეს.

 

-თქვენ ახსენეთ თავდაცვის ყოფილი მაღალჩინოსნები. როგორია თქვენი პოზიცია ე.წ. კაბელების საქმისადმი?

 

-ჩემი დამოკიდებულება არის ის, რომ ეს საქმე დღემდე ძალიან ბუნდოვანია.დღემდე არ არის გამოაშკარავებული ბევრი დეტალი, რა და როგორ, რატომ მოხდა. ბევრად უფრო უკეთესი იქნება, რომ საზოგადოება იყოს უკეთ ინფორმირებული, ეს ჩვეულებრივი საქმე არ არის, ბევრი ვარაუდი გამოითქვა, იგივე ალასანიამ. ეს არ იქნება პირველი და უკანასკნელი შემთხვევა, როდესაც არასწორად დაკავდნენ ადამიანები. ეს არის იქნება პირველი მაგალითი, როდესაც ასეთ სისულელეს აკეთებს ჩვენი პროკურატურა. მე ბოლომდე ვერვიჯერებ, რომ იმ თანხებზე არის საუბარი, მე ამ სისტემაში ნამუშევარი ვარ და ამ თანხებზე საუბარი არ ხდება. საერთოდ, კორუმპირებული სქემები სხვანაირად მუშაობს. ზოგადად, ძალიან გონივრულ ეჭვს აჩენს.

 

-ბოლოს მინდა გკითხოთ, ქვეყნის ევროპულ კურსთან დაკავშირებით. ფიქრობთ თუ არა, რომ საქართველოს ევროინტეგრაციას საფრთხე ემუქრება? ჩვენ გვახსოვს ამ მიმართულების მინისტრების განცხადებები, რომლებმაც სწორედ კურსის ცვალებადობის მიზეზით თანამდებობები დატოვეს...

 

-კურსი, როგორიც ჰქონდა ამ მთავრობას, ის იგივე რჩება. „თავისუფალი დემოკრატების“ ქმედებაში არის ერთი რამ უცნაური, 2 წელი ყველაზე აქტიური ადვიკატები იყვნენ ბატონი ბიძინასი და მისი პოლიტიკური კურსის, მერე უცებ ალასანია რომ მოხსნეს, 2 საათში საქართველოს კურსს საფრთხე დაემუქრა. მე ვთვლი, რომ ამ მთავრობას ისედაც ფრთხილი კურსი აქვს არჩეული, რაც საქართველოსთვის კარგი არ არის. ჩემი აზრით, წინა ხელისუფლებასავით, რუსეთთან აგრესიული არ უნდა იყო, მაგრამ ისეც არ შეიძლება, რომ ის არ გავაღიზიანოთო. თუ ასე იყო, თვითონ რატომარ გადადგა ალასანია? ბატონი ირაკლი და მისი გუნდი ძალიან ევროატლანტიკოსები არიან, ძალიან კარგ როლს თანაშობდნე და ბევრი დაკარგა მთავრობამ მათი წასვლის შემდეგ, რადგან რთულია ამ ყველაფრის ჩანაცვლება, მაგრამ გაცხადებულ დონეზე კურსი იგივე რჩება, ამ კურსზე მაშინაც და მის მერეც კითხვის ნიშნები არსებობს. კითხვები, ისევე როგორც სხვა ადამიანებს, მეც მაქვს, ცვლილებას 2012-სა და 2015 წლებს შორის მე ვერ ვხედავ.

კომენტარები

მსგავსი სიახლეები

Developed by: Giorgi Mshvenieradze
© 2013-2014 IVERIA.BIZ საავტორო უფლებები დაცულია